PREPARADOS PARA O SAMAÍN?

 Na nosa biblioteca xa estamos case listos para celebrar o noso Samaín, aínda que este ano imos xuntalo co tradicional magosto, que celebraremos, como ten que ser, o próximo 11 de novembro, día de San Martiño.

Así que... 

POLO SAN MARTIÑO... MEDIÑO MEDIÑO!

Mentres chega o día, estamos decorando a biblioteca, por dentro e por fóra, e axudándonos uns aos outros a crear un ambiente de terror, adornando as portas das clases e outros espazos.

 

    

Temos tamén, coma outros anos, unha pequena mostra de libros de medo e misterio, para todas as idades e en todas as linguas que se imparten no noso centro, espallada polas mesas e expositores da biblioteca. 

Podedes pasar ver... e axudar, se queredes!

Ademais, o alumnado de 1º da ESO vén de rematar de ler un libro que xa é un clásico e que lles gustou moito: Escarlatina, a cociñeira defunta.

   

Agora van dedicar estes próximos días a crear, escribir e cociñar unha receita ao estilo de Román, o protagonista. Xa sabedes: ten que ser un prato que lles guste a vivos e mortos, así que terá que ter unha apariencia e nome noxentos pero un sabor exquisito. 

O día de S. Martiño estades convidados a probalos 

e votar pola mellor sobremesa do Inframundo!

Publicacións da Costa da Morte

Acaba de saír do prelo este libro, e vimos de recibilo na nosa Biblioteca por doazón do Concello de Ponteceso, a terra deste importante personaxe da nosa bisbarra. 

Francisco Mourelle de la Rúa, natural de Corme (Ponteceso), foi un dos máis importantes navegantes do século XVIII. Participou en importantes expedicións explorando a costa de América do Norte, desde California ata Alaska. 

As anotacións e descricións que fixo no seu diario foron publicadas e inglés e utilizadas por exploradores tan importantes e coñecidos como Cook ou La Pérouse.

Posteriormente participou tamén noutras importantísimas expedicións de exploración de varias illas do Pacífico, descubrindo e nomeando moitas delas.

Por último, de volta en España, participou tamén na guerra naval contra as tropas de Napoleón.

Os seus restos repousan no Panteón de Mariñeiros Ilustres de Cádiz.

ANDANDO DE TRABA A CAMELLE

 Como sabedes, a Biblioteca colabora con varios Departamentos do centro na organización e realización de diversas actividades. Nesta ocasión, co de Educación Física, ofrecendo información para preparar unha serie de roteiros pola contorna máis próxima, e axuda para guialos.

O primeiro deles foi o que realizamos o pasado venres 14 co alumnado de 2º curso da ESO, seguindo parcialmente unha das etapas do Camiño dos Faros, entre os lugares de Traba (Laxe) e Camelle (Camariñas), e pasando tamén pola costa de Vimianzo-

Ah, que non sabiades que Vimianzo ten costa? Pois ten, non moita pero algo aínda, nos fermosos coídos de Sabadelle e da Señora. O que non demos sabido de xeito definitivo é se estes dous lugares pertencen á parroquia de Carantoña, á de Pasarela ou ás dúas. Isto queda para unha próxima investigación.

Aquí vos deixamos algunhas imaxes desta estupenda xornada:

 

 

 

ENCONTRO COA POETA DORES TEMBRÁS

 No día de onte celebramos na nosa Biblioteca o primeiro encontro deste curso cunha autora.

Neste caso visitounos a poeta Dores Tembrás, para impartir dous obradoiros relacionados con dúas figuras femininas moi importantes na literatura: unha mítica e literaria, Penélope, e outra moi real e presente, Rosalía. 

A estes obradoiros asistiu o alumnado de 1º de Bacharelato e 3º da ESO, respectivamente.

Grazas, Dores, por facernos ver estas dúas mulleres desde ópticas diferentes.

AMOSANDO O NOSO PATRIMONIO

 Un grupo de alumnos e alumnas do equipo da biblioteca, e outros de diversos cursos do noso centro, frecuentaron a biblioteca estas dúas últimas semanas para investigar e ampliar o seu coñecemento sobre o noso patrimonio natural e etnográfico, co fin de preparar unha visita guiada teatralizada pola ruta do río de Cambeda.

Durante a mañá do pasado sábado acompañaron os visitantes que se quixeron achegar por este fermoso roteiro, trasladándonos á metade do século pasado, e amosándonos muíños, regos de lavar, a "fábrica da lus"..., e amosándonos costumes e circunstancias do momento, como a emigración, os traballos de homes e mulleres, o labor dos mestres ou o poder da Igrexa.

Parabéns por este importante traballo, co que aprendemos xuntos sobre o noso patrimonio e amosámosllo a quen nos visita.

  

  

  

DÍA DA SAÚDE MENTAL

 Hoxe conmemórase o Día Internacional da Saúde Mental.

Lembrámosvos que na vitrina do exterior da biblioteca podedes ver unha selección de libros relacionados con este tema, varios deles novidades acabadiñas de chegar ao noso catálogo.

Pero non esquezades que temos máis. Entrade e preguntade!

PATRIMONIO MEGALÍTICO DA COSTA DA MORTE

 

Este curso a nosa biblioteca participará en varios proxectos do centro. Un deles é o de Polos Creativos. Dentro deste programa traballarase sobre varios temas. Un deles é o megalitismo da Costa da Morte, empezando pola gran riqueza megalítica do noso concello. O obxectivo é investigar sobre este tema, tanto na biblioteca como sobre o terreo, e rematar plasmando este traballo nun audiovisual.

Para ir entrando en materia propoñémosvos a asistencia a esta xornada que se celebrará o próximo sábado, día 8. Se podedes asistide: vai ser moi interesante.