QUE MAÑÁ TAMÉN SEXA O DÍA DAS NOSAS LETRAS, E PASADOMAÑÁ, E SEMPRE

 Vai rematando o Día das Letras Galegas pero non remata aquí o noso interese pola literatura nin a reivindicación da normalización da nosa lingua.

Mañá volvemos á clase e, os que aínda non a vistes, podedes ver a exposición dos traballos de interpretación dalgúns versos de Xela Arias que fixeron en 4º da ESO coa súa profe de Debuxo. Aquí vos deixo unha mostra:

 

Tamén poderedes ver expostas as obras onde se recolle a poesía de Xela, así como unha mostra dos libros traducidos por ela.

Non deixedes de pasar pola biblioteca, para celebrarmos 

365 DÍAS DAS LETRAS!

Emilia Pardo Bazán: centenario do seu falecemento

 O vindeiro mércores 12 de maio cúmprense 100 anos do pasamento da escrirora Emilia Pardo Bazán. Na nosa Biblioteca poderedes atopar as súas obras, biografías e outro material sobre esta autora pero para celebrar este aniversario queremos compartir convosco unha novidade da nosa Biblioteca que ten a dona Emilia como un dos seus principais personaxes.

Trátase de A tumba de Breogán, unha novela gráfica publicada a finais de 2020 e da autoría de Abel Alves e Esteban Toj. Na novela, ambientada na Coruña en 1870, unhas escavacións na Torre de Hércules descobren un antigo enterramenteo que Eduardo Pondal vai relcionar coa tumba de Breogán. Póñense así en marcha unha serie de acontecementos nos que Pondal vai precisar a axuda do bandoleiro Anton Dedo d'Ouro e pola que van transitar Manuel Murguía, Rosalía de Castro ou Emilia Pardo Bazán. Esta última ten un especial protagonismo ao axudar a Antón a liberarse dos seus perseguidores.

Unha excelente proposta de lectura para conmemorar o aniversario da autora coruñesa.

De Rosalía a Xela: Xoga ao 21 coas nosas escritoras

 Co gallo do Mes das Letras, a Biblioteca o o EDNL convoca un concurso para o alumnado da ESO que consiste en investigar sobra a obra das nosas escritoras. Das 21 escritoras seleccionadas, haberá que atopar 1 obra de cada unha delas e indicar a que xénero literario pertence. O prazo de entrega é ata rematar o mes de maio e o lugar é a Biblioteca do IES.

Aquí están as bases do concurso.

Entre os que acerten as 21, sortearanse 10 premios. Moita sorte!

A ESCRIBIR!

 

Lembrade que, desde o Día do Libro ata o remate deste mes de maio, o Mes das Letras, está aberto o prazo para participar no concurso de poesía e narrativa que convocan, como cada ano, a Biblioteca e o Equipo de Dinamización Lingüística. Xa imos pola 11ª edición!

Podedes consultar as bases na Biblioteca e nos taboleiros de cortiza das vosas aulas. Mirádeas ben e animádevos a participar.

Non vos despistedes, que o tempo corre!