Como sabedes, o próximo venres celebraremos o magosto e a nosa festa do Samaín, e esta semana preparámonos escoitando os rapaces e rapazas de Teatro de 1º contándonos os seus contos de medo.
Os de Iniciación ás Artes Escénicas de 2º tamén quixeron participar e escolleron un conto que forma parte dos clásicos da Literatura Galega: Os lobos, de Ánxel Fole.
Poderemos ver como o poñen en escena o venres no segundo recreo, na Sala de Usos Múltiples.
Achégase o Samaín, e con el a tradición de contar, escoitar, escribir e ler historias arrepiantes.
Por iso os nenos e nenas do Obradoiro de Teatro, de 1º da ESO, queren facer a súa primeira aparición en público nestas datas.
Para iso viñeron á nosa Biblioteca en busca de ideas, atoparon moitos libros con relatos moi axeitados para esta época do ano, e inspirándose neles adaptaron ou crearon os seus propios
Se queredes ver como os len/contan/escenifican, achegádevos á Biblioteca nos primeiros recreos desta semana!
E non esquezades que tamén pasou por aquí o alumnado de Literatura Universal, buscando inspiración para o seu
CONCURSO DE RELATOS TERRORÍFICOS
Dentro duns días, durante a celebración do Magosto, coñeceremos quen son os gañadores!
PARA REMATAR O MES DAS BIBLIOTECAS...
QUERES XOGAR CONNOSCO?
Como é información moi faciliña de atopar, hai que facelo axiña: entrega a túa ficha debidamente cuberta ao longo da vindeira semana, entre o luns 25 e o venres 29.
Entre as persoas que completen
todas as respostas correctamente, sortearemos varios agasallos.
Aproveitando que se está conmemorando o quinto centenario da primeira volta ao mundo, a de Magalhaes e Elcano, queremos dedicar parte das lecturas deste ano a obras, tanto de ficción como de non ficción, nas que se relatan grandes viaxes.
Non serán as únicas lecturas que fagamos, pero queremos ler, reler ou lembrar polo menos algunhas, co fin de homenaxear algúns deses grandes viaxeiros da vida real, como os mesmos Magalhaes e Elcano, pero tamén outros como Marco Polo, Darwin, Amundsen, Isabel Zendal ou a gran Exeria.
Pero tamén, como non, os grandes da ficción, desde Ulises ata o capitán Nemo, e tantísimos outros personaxes, tamén da narrativa máis recente, como Denébola a Roxa, e moitos máis que iremos descubrindo ou redescubrindo ao longo do curso, mediante as diversas lecturas, desde as recomendadas para as "Horas de ler" das distintas materias e niveis, ata as propostas do Club de lectura.
Esperamos que vos gusten moito, e que deamos con elas non unha, senón moitas voltas ao mundo
Aquí podedes ver as dúas caras do folleto, en forma de tríptico, que tamén atoparedes por varios espazos do centro.
Esta é a cara exterior:
Xa van chegando á nosa Bibliosoneira libriños novos, que podedes ver nos expositores da Biblio e tamén nos do corredor.
No blog tamén volos iremos amosando de cando en vez, pero o mellor é que pasedes pola biblioteca e os miredes vós mesmos.
Aquí vos ensinamos algúns. Como vedes, hai algo de todo: en galego, en castelán, en francés, inglés, portugués... Empezan a chegar tamén libros informativos de temáticas diversas e, como non, algo que vos gusta tamén moito: banda deseñada, manga, novela gráfica. E tamén temos, e teremos máis, publicacións máis adaptadas para os máis novos, ou para os que non se lles dá demasiado ben a lectura: máis pequenos, máis doados de ler, con moita ilustración... en fin, hai para todos os gustos. Só faltades vós, lectoras e lectores.
Visitádenos; na Bibliosoneira sempre sodes benvidos 🙋👋
O "XURELO" E AGUSTÍN FERNÁNDEZ PAZ
O pasado mes de setembro cumpríronse 40 anos da travesía do "Xurelo", un barco pesqueiro de 21 metros de eslora no que, no outono de 1981, varios activistas e xornalistas galegos embarcaron coa intención de chamar a atención da comunidade internacional e denunciar os vertidos de residuos radioactivos que oito países europeos viñan facendo na chamada Fosa de Hércules ou Fosa Atlántica, fronte á costa galega.
Recoméndovos tamén que leades esta entrada no blog Brétemas, onde podedes atopar o relato desta acción reivindicativa, e tamén algunhas imaxes.
PERO QUE TEN QUE VER TODO ISTO CO ESCRITOR AGUSTÍN FERNÁNDEZ PAZ? - preguntaredes vós.
Pois veredes:
Despois de tres días de navegación, por fin atopáronse con dous cargueiros holandeses escoltados por unha fragata da armada dese país. Os tripulantes galegos non puideron impedir o lanzamento ao mar de gran cantidade de bidóns con material radioactivo, pero transmitirono por radio, fixeron fotografías e vídeos para documentar este feito, e finalmente lanzaron ao mar ramos de caraveis, como símbolo de que estaban ante o que se estaba a converter nun cemiterio.
Poucos anos despois, e en relación con isto, Agustín Fernández Paz publicou AS FLORES RADIOACTIVAS, unha novela que tivo no seu momento moito éxito, e que posteriormente foi reeditada incluíndo anexos sobre outros feitos como o accidente da central nuclear de Fukishima.
Este é un dos libros que merecen unha relectura, e que mellor momento ca este!
